Para celebrar o día da Poesía, nas nosas aulas transformamos as palabras en arte visual. Partindo dun sinxelo material -un papel A3 e 4 tiras de cartón- cada clase elaborou o seu propio cadro inspirado nun poema.
Pero a poesía non só se mira, tamén se escoita. O alumnado completou a xornada cun emocionante recitado colectivo que encheu de versos o centro.
Ao longo da semana do 19 ao 25 de febreiro celebramos o Día de Rosalía de Castro, unha figura esencial da nosa identidade. Rosalía ensinounos que a palabra pode ser arte, memoria e resistencia; que a creación é un xeito de mirar o mundo con sensibilidade e valentía.
Quixemos honrar este espírito creativo cunha actividade moi especial: todo o alumnado do centro decorou a súa propia saca de tea, transformando ideas, cores e emocións en pequenas obras de arte.
Grazas a Rocío Estévez e a Algodón Estudios polo seu bo facer, pola súa dedicación e pola súa paciencia infinita. Grazas por axudarnos a que a arte, a de Rosalía, siga viva e compartida.
De debuxo, de escritura creativa, de lettering, de pixel art, de lego, tangram, kamishibai... Nos recantos da BIBLIOTECA CREATIVA tes unha morea de opcións para escoller. Na semana do 26 ao 30 de xaneiro decidimos facer unha sesión de presentación para cada aula, para que todos, alumnado e profesorado saiban como utilizalos.
.jpg)
Como remate final das actividades do club de lectura gravamos un audiolibro titulado "A estrambótica volta ao mundo en oitenta días" de PINTO & CHINTO. Anímovos a que o vexades, mergullarédesvos nunha extraordinaria aventura.
